В лЬто 6860. Рукописание Магнуша, короля свЬйскаго. Се язъ, князь Магнушь, король свЬйский, нареченый въ святомь крещеньи Григорий, отходя сего свЬта, пишу рукописание при своемъ животЬ, а приказываю своимъ дЬтемъ, и своей братьи, и всей земли СвЬйской: не наступайте на Русь на крестномъ цЬлованьи, занеже намъ не посабляется.
       Первие сего подьялъся местерь Бельгерь и шелъ в Неву, и срЬте его князь великий Александръ Ярославич на ИжерЬ-рЬцЬ, и самого прогна, а рать его поби.
       И потом брат мой Маскалка, вшедъ в Неву, городъ постави на ОхтЬ-рЬцЬ и посадникы своя посади съ множествомъ нЬмець, а самъ поиде за море.
       И пришед великий князь АндрЬй Александрович, город взя, а намЬстники и немЬць поби.
       И потом было намъ розмирие с Русью 40 лЬт.
       И потом за сорок лЬт с великимъ княземъ Юрьемъ Даниловичемъ взяли есмя миръ вЬчный на НевЬ, земли есмя и водЬ учинили роздЬлъ, кому чЬм владЬти, и грамоты есмя пописали и попечатали.
       И потом за 30 лЬт, язъ, Магнушь-король, того не порядя, поднялся есмь съ всею землею СвЬйскою, и вшед в Неву, и взя город ОрЬховъ и намЬстники есмь свои в городЬ посадилъ, и съ ними нЬколко силы моей оставих, а самъ есмь пошелъ за море. И потомъ новогородци пришед, город свой взяли, а намЬстниковъ и немЬць побили, которыи сидЬли в городЬ.
       И язъ, того не порядя, за одинъ годъ, опять пошелъ к ОрЬхову съ всею СвЬйскою землею; и стрЬти мя вЬсть, что новогородци под ОрЬховцемъ. И язъ опять пошел под Копорью, и под Копорьею есмь ночь ночевал; и вЬсть ко мнЬ пришла: новогородци на украЬ земли. И язъ послышевъ, побЬглъ за море; ино в валу парусовъ не знати; и въста буря силна, и потопи рати моей много на усть Неровы-рЬкы. И пошелъ есмь в землю свою съ останкомъ рати.
       И от того времени наиде на нашу землю СвЬйскую погыбель: потопъ, моръ, голодъ и бысть сЬча межди собою. У самого у мене Богъ отъя умъ, и сЬдЬх в полате год прикованъ къ стЬнЬ чепию желЬзною и задЬланъ есмь был в полатЬ.
       И потомъ приЬхалъ сынъ мой Сакунъ из Мурманьской земли, и выня мя ис полаты, и повезе в землю свою Мурманьскую. И удари на мене опять потопъ, корабли мои и люди мои истопи вЬтръ, а сам сътворихся на днЬ корабленемъ, и с торцнемъ пригвоздихся, три дни и три нощи. И по Божию повелЬнию, принесе мя вЬтръ под манастырь святаго Спаса в Полную рЬку, и сняху мя со дьскы черньци, и внесоша мя в манастырь и постригоша мя в черньци и въ скыму; и сътвори мя Господь три дни и три нощи жива. А все то мене Богъ казнилъ за мое высокоумие, что есмь наступалъ на Русь на крестномь целовании.
       И нынЬ приказываю своимъ дЬтем и своей братьи и всей земли СвЬйской: не наступайте на Русь на крестномъ целовании; а кто наступить — на того огнь и вода, имже мене Богъ казнилъ. А все то створилъ Богъ къ моему спасению.